ترک ائدور آز قالور حسین تیره جهانی زینبون

گوزلری آختارور سنی فاطمه جانی زینبون

 

اللی بئش ائیلدی سایه لطفوه دالدالانمیشام

عشقیوه دستگیر اولوب شهرلری دولانمیشام

شمع یانوب خموش اولار منکه همیشه یانموشام

اللی بئش ائیلده سونمیوب سوز نهانی زینبون

 

آزقالوری یومولماقا اشک تری آخان گوزوم

میلۀ غصّه سُرمه سین کیپریگینه یاخان گوزوم

قتلگهونده نعشیوه حسرتیله باخان گوزوم

منتظروندی دیدۀ اشک فشانی زینبون

 

شامه اوزاقدی کربلا چوخدی اگر چه فاصله

سن آقاسان اوزاق یولون زحمتینی قبول ائله

بیر یول ایشیم دوشوب سنه گلمسن ایلرم گله

غملی باشین دیز اوستونه یوخدی آلانی زینبون

 

من دئدوم عمرومون گلی عزّتیلن سولار حسین

تربتیوی ئوپر باجون جام صفا دولار حسین

غصّه لی روحی غصّه دن اوردا خلاص اولار حسین

گورمدی جان وئرن زمان کرب و بلانی زینبون

 

سوز غمونده قلبیدن عود کیمی آلیشمیشام

هاردا دئیوبله آدیوه خارجی من دانیشمیشام

هاردا سالوبلا مشکله عترتیوی چالیشمیشام

عزّتیله دولاندیریب آل عبانی زینبون

انور(ره